أحدٍ ليا منه تغلى يخلى
واحدٍ يزود في غلاته تغليه
يا ذاك حبك عن فؤادي تولي
ناسيك لي مدة وطاريك ناسيه
الوقت الأول راح دوره وولى
يوم إن قلبي في يدينك تمشيه
اليوم مالك منزله لو تغلى
وش لي بحب الي يغير مباديه
أقول للغدار لا، لا، وكلا
واقول للي يوفي العهد لبيه
تراني أول فيك كنت أتسلى
والا الخفيف كان جا الجد ما بيه
رفيقي الي يحفظ العهد والا
على عديم الذات مالي مشاريه
وإن جيت له من قلب رحب وهلا
مطلوبه رضايه وانا شفي أرضيه
هذا الذي في عرش قلبي تعلى
وعليه مكنون الصناديق نبديه
والعاقل اللي بالأمور يتحلى
يلقى الطريق إلى يدله ويعطيه
من جالس أهل الكير منهم تملى
والي يجالس راعي الطيب يحذيه
ولا كل مخلوقٍ تغلى يخلى
بعض المخاليق يتغلى ونغليه
"مدارات شعبية"