نجدد ولانا للفهد كل مبدأ يوم
نجدد ولانا للفهد دوم وأخوانه
ونثبت وفانا لا حصل فالعلوم علوم
من أجل الوطن حوض الوغى نرد ميدانه
على أمر الفهد لأجل الوطن نمتثل بعزوم
اليا دخن البارود ثم ثار بركانه
وطنا وطنا ما نبيعه بغال السوم
نفادي بغال المال والروح من شانه
تحت راية التوحيد وقت اللزوم انقوم
بعزم الليوث ندوس هامات عدوانه
ندوس الحيايا الرقط ولسانها المسموم
ورأس الحنش ندق رأسه ونيبانه
نبي نردع اللي من رخا دارنا مغموم
تأمر على أمن الدار وأخلص لعدوانه
حقود بعار الغدر من خلقته موصوم
وكبده من الأحقاد والغيض مليانه
تعاون مع الشيطان وأصبح معه ملموم
على أمن الوطن خطط مع إبليس وأعوانه
وهو مثل شيطانه برأي الولي مرجوم
ومخذول بأمر الله كما خذل شيطانه
نسى ان الوطن دونه بوقت اللزوم اقروم
وجيش بحزات الخطر شيف برهانه
على أمر الفهد لاجا الخطر ينطحه بقدوم
بجيش وحرس في مقدمه قايد أركانه
بتوجيه عبد الله ودعمه يضد القوم
ولي العهد ساس الضفر فيه عنوانه
وسلطان قايد جيشنا بالوغى زيزوم
بوقت الخطر مقدام جيشه وسلطانه
ونايف وزير الداخلية بفعله دوم
أمان الوطن هو ساس جهده ونيشانه
أقوله وأنا من لابة خصمها ملطوم
هل الماقف اللي بالوفى ثابتٍ شانه
عتيبه ولانا للملك والوطن معلوم
بماضي وحاضر ما اختلف دوم ميزانه
نوالي مواليكم ولخصومكم خصوم
ومن ماضي التاريخ حتى آخر أزمانه
عسى من يعاد المملكة خاسر مهزوم
بدنياه والأخرى يخلد بنيرانه
وعسى الله يعز مقدي التايه المنجوم
فهدنا وعبد الله وسلطان واخوانه
"مدارات شعبية"