يا صاحبي ليش الهجر قول وشفيك
أحرقت قلبْ ارتمى في يدينك
طال الجفى والروح عيت تجافيك
واشقيت عين ما هوت غير عينك
لا تترك الحاسد مع الظن يرميك
ترى الحسود أن طحت ماجا يعينك
وان كنت تزعل شف جروحي بترضيك
لا عاش شخص في حياته يهينك
يا مبعد علي ترى الروح تغليك
كل المشاعر في الحشى مهتوينك
يمكن تقفي عن عيوني واناديك
وترمي فؤادي في بقايا سنينك
لكن تذكر دمعته دوم ترجيك
صاحت على الخدين يا خل وينك
يا شين ارض ما وطتها خطاويك
ويا شين شمس مادرت عن جبينك
مهما يطول الوقت ماني بناسيك
غصب على ارضي بزينك وشينك
يشيب راسي ما قطعت الرجى فيك
ويروح عمري ينقضي في يمينك
يجمع عظيم الشوق يمكن الاقيك
يمكن يجي في يوم يردك حنينك
"مدارات شعبية"