حبيبتي شفتك بذيك السحابه
يوم اقبلت شفتك تتقين بالغيم
الوجه يضحك دنيتي لاغرابه
يضحك على الهتان مدري على الديم
صدق المعالم والاسامي تشابه
الا انتي انتي ريم ما يشبهك ريم
فيك الوفا فيك الحلا واللبابه
وفيك القول وفيك ما يبعد الضيم
وفيك الجراءه والغضب والرحابه
وفيك التغنج والدلع والترانيم
وفيك الجمال اللي يزود الحلابه
الزين بيّن واضحات المراسيم
شخصيتك تضفي عليها المهابه
اعطتك ياروحي مكانه وتعظيم
شاعرك بحرك يا جميله غدابه
تحطمت كل المجاديف تحطيم
واضيعته شاعرك ضيعة شبابه
ولا تقول وما حصّله مقاسيم
سؤال واحد ينتظر للإجابه
اليامتى وانا بغباتك اهيم
"مدارات شعبية"