ياللي عليه تشتكي ضيقة البال
يامن امصيبك من زمانك احزوني
تشكي ظروف الوقت يا طيب الفال
وشكواك.. يا مشكاي هاضت اشجوني
تبي الصراحه كلمة الحق تنقال
جتك الاجابه يا ولد واسمعوني
الصبر زين وضيقة البال تنجال
لابد من عقب الحزن تفرحوني
مالك عن المكتوب منهج ومحوال
والرزق عند اللي ينشى المزوني
وايام عمرك كلها ايام وليال
ياسرع من دنياك ماترحلوني
لاشك اخذ كلمه لها دور فعال
فعال معناها لمن يفهموني
ياصرت متعافي ترى مابه اشكال
كل المشاكل باذن ربي تهوني
يهون ما يصعب اليا سلمت الحال
ما دمت في صحه ولا فيك لوني
ما تنتعوض صحة الحال بالمال
ولا به عوض للحال مهما يكوني
ما تنفع الدنيا ولا المنصب العال
لو كان تفقد مبصرات العيوني
ومن ينكر الصحه من الناس جهال
ناس على اوتار الجهل يعزفوني
هذا مثل للي يحبون الامثال
وان كان ماهو مكتمل فاعذروني
"مدارات شعبية"