يا اللي معك قوه وتدحم بجنبين
ميز خطاك ولا تضيّع صوابك
شوف العبر وش كثرها يسار ويمين
خذ عبره وسكّر عن الشر بابك
خل الجشع واترك طريق الشحيحين
ويغنيك ربٍ متّعك في شبابك
لا تاكل حقوق الضعوف المساكين
تبلى ببلواً ما تفارق جنابك
اما تعجل لك وتاخذ بك سنين
والا بيوم الحشر يصعب حسابك
ما فيه حق ضاع يا مراكم الدين
مسجلٍ فعلك بصفحة اكتابك
يا كبر همك لو تخف الموازين
ما احدٍ يبي ينقل عناك وعذابك
راجع حسابك وافرق الزين والشين
واحذر تدنّس في يدينك اثيابك
لا تشري الدنيا وتعرض عن الدين
وتتبع هواك اللي جذبك وغدابك
وش حجتك من بعد كشف البراهين
هذا السؤال ودي اسمع جوابك
"مدارات شعبية"