أحمد توفّى .. قالها دون تفكير
الله يعظم أجركم في وفاته
زهرة شبابه قصها حادث السير
وانهى السياج اللي بقى من حياته
حاولت ابستوعب أبي أي تغيير
ارجوك عدّل هالخبر ثم هاته
قال الوفاة ومالها أي تفسير
أحمد ولد خالك وهذي صفاته
تناثرت دمعات عيني بتعبير
بعده ذبل معنى الفرح وامسياته
محدٍ عرفه الا ويذكره بالخير
كل الرفايق تشكره في سواته
واللي نوى قربه يجي دون تفكير
حيث ان قلبه واثق من حلاته
شهمٍ خدوم معطر الود تعطير
يقوم بالواجب ويحفظ صلاته
ما ذكر به يوم قد اخطا على الغير
وما ذكر به وقت نقص في غلاته
طلبت ربي مدبّر الخلق تدبير
انه يعوض ذا الشباب برضاته
وطلبت ربي كل سجدة وتكبير
أنه يونس ذا الفقيد بمماته
ويفتح لقبره باب من حوله الطير
يلقى به الجنة وكل امنياته
هذي المنية ما تجينا بتخيير
وما تخبر ابن ادم يجهزّ وصاته
ما تروي سموم الحزن وقفة البير
لا من فقدنا في النواظر رشاته
من يوم مات وهالقراين غدت غير
تعيش لحظات الحزن من وفاته
"مدارات شعبية"