الله عطانا الفكر والعقل والدين
والله عطانا باليدين الوسيعه
والله عطانا ملوك نجد السلاطين
حكامنا تنهج بنهج الشريعه
والله عطانا رجال أمن شجيعين
بقيادة النايف وخوه ومطيعه
مطوعين العاصين الشياطين
الزمره اللي مالها إلا الفجيعه
يا ملفقين الهرج منتم قريبين
تخسون ما تطون داراً رفيعه
يامزعزعين الامن انتم مساكين
قدامكم دارن حصونه منيعه
دارن بها طفل ويتيم ومسّنين
وفيها رجال ماتهاب الطليعه
حنا رجال الامن برقابنا دين
ومعاهدين بالقسم ما نبيعه
حنا كعام للعدا بالميادين
نقضي على الفاسق ونبطل صنيعه
يالشرذمه يالفاسده يالخبيثين
والله ما تبكي عليكم رضيعه
الدين شرع الله نعرفه من سنين
الدين يبرأ يالوجيه الشنيعه
استبشري يا دار حنا ملايين
نطا على وجه العدو ما نطيعه
"مدارات شعبية"