يا عاذلي لا تعذل القلب خله
القلب مما حسبه تبكي العين
والعين لو زاد البكا ما تمله
تبكي على اللي ليتنا له خويين
اعز ما عندي على الكون كله
ودعتها في واحد اثنين الاثنين
بعد صلاة العصر مع ميل ظله
ثاني شهر من عام خمسه وعشرين
الى مضى يسمع وانا سامعله
واليوم هو وينه وانا عالمي وين
عقب اللحاف الزين رملا نهله
وعقب المخده ريش وسدتها طين
أقفيت وانا اقول يا لله لعله
في جنت الفردوس جار النبيين
ويالله توسع جلسته في محله
عبدك يجي لك ضيف يا كرم كريمين
وقت السؤال لكلمة الحق دله
وتثبته بالحق لن جوه عجلين
واليا اسألو عما بحياته حصله
اثبته يالله على كلمة الدين
وعسى السحاب اللي مزونه مطله
ينزل على قبره مطرها ودادين
ويصير قبره زهرتن مستقله
ترتيب رب الكون ما حط بيدين
وانا لوني بالقصيد اتدله
والله ماظني عن الأم سالين
الام ما تحصى افضالها ابد لله
افضالها فرقابنا ثابته دين
الأم كهف مستريحن بظله
الأم روضاً فيه ورد وبساتين
والأم معها ما تحس بممله
وأنا اشهد ان الام هي قرة العين
لاكن مكتوبا من الله حصله
ذي سنة الخالق بها الخلق ماشين
وانا لوني بالقصيد اتدله
ماظن احد يقوا على فراق غالين
"مدارات شعبية"