يا ليل يا ما أطولك ومن أنت ليله
أبكيت بأخبارك عيون الكثيرين
اللي اكتب فيك الصوينع رحيله
وتكدروا فيك العرب والسلاطين
أبوك يا مطلق فقيد القبيلة
مهوب بس اللي فقيد الدعاجين
كل على فيحان جر الطويلة
من ربعنا الأدنين والربع الأقصين
ما كل راس حط فوقه نثيله
يبكونه الأقصين قدام الأدنين
الله هو اللي في يديه الوسيله
طين بتدبيره يعود ليا طين
لكن ما بيدين الانسان حيله
الناس حتى تموت فالهند والصين
والفرق في لجفٍ يجي به نزيله
حياء ومات وعنه ما همب دارين
قفيت يا كساب بيضاء الجميلة
أبيض وجه وكتاب وأيضا أبيض يدين
خزنة رصيدك فالمصارف قليلة
وبنك المكارم به رصيدك ملايين
مسعاك في دنياك نيل الجزيلة
قول عليه من الحوادث براهين
الله يعوضك بالجنان الظليلة
فيها مكانك من رياض البساتين
فيك العزاء شقر الحرار الأصيلة
المومنين الصايمين المصلين
جيل يجي ويروح من بعد جيله
وفيحان باقي دام الأشبال باقين
أكبرهم اللي مع دروبه دليله
وأصغرهم اللي ما مشي الدرب تخمين
طبع سجية ساسهم ينتمي له
شيء عليه من الجدود امتواصين
مرحوم يلي جعل قبرك خميله
آمين ثم آمين ثم قولوا آمين
"مدارات شعبية"