تسلم لشعبك لاعدمناك يامير
يا شاري العليا بغالي ثمنها
لك موقفٍ مشهود بين الطوابير
ولك كلمةٍ في الحق ما حدت عنها
رفعت راس اللي براسه سعاطير
واخرست من نفسه تزايد عفنها
ودقيت في نعش الهياما مسامير
اللي تخطّا والمرض في بدنها
وجاءت الحقيقة واضحة دون تزوير
للأمة اللي عوقها صار منها
يا ما التمسنا للخطية معاذير
من زمرةٍ صيت السعودي غبنها
ويا ما تحملنا كثير المخاسير
لاجل العرب من شامها لا يمنها
نعطي بلا منة جنيه ودنانير
ودارالعروبة من تضايق زبنها
دار الوفا.. دار الرجال المناعير
دارٍ بها راع الكرامة ضمنها
يا بلادي اللي حبها شلته صغير
أكبر ويكبر لو تطاول زمنها
حبك ورثته من سيوف بواتير
اللي فدت بأرواحها عن وطنها
لا يشغلك يا دار خطوا معيثير
اللي حياته بالمهازل قرنها
أرقي سنود ولاتهزك الأعاصير
مامونةٍ شر العفون وفتنها
في ظل شيخ يحكم الراي ويشير
فهد العرب لا قال كلمة وزنها
عاش الزعيم مسطّر المجد تسطير
شيخٍ يمينه بالمكارم دهنها
ومني لأبو متعب سلامٍ وتقدير
اللي شرى العليا بغالي ثمنها
"مدارات شعبية"