لنداك يا كاسب الطولات لبّينا
سمع وطاعه نجي لحظة تنادينا
أمرك يابو متعب نطيعه ونمشيبه
لبّيك يا سيّدي لرضاك قد جينا
يا نادر بالعدل والجود لك رايه
خفاقةٍ عالية فيها تذرّينا
وابوابكم يا ولي العهد مفتوحه
بالفعل ما هي دعاياتٍ حوالينا
مابه ديمقراطي في الكون غير انتم
فعلٍ ما هو هرج حتى يقال غادينا
يا شوق بنت الرجال اللي مواقفهم
من طيبهم كنّهم لليوم باقينا
بكم الشرف والكرم والعز والشيمه
والعطف واللطف منكم قد تلقينا
والكل منكم يقول ويعلن اقواله
عن منهج الشرع مابه شخص يثنينا
يا والي العهد عضد الفهد سعدٍ له
يا قايد رجال فرسان مفادينا
بارواحكم دونكم في الكون بذاله
يا ويل في قدرة الله من يعادينا
ما دام خادم بيوت الله لكم يسأل
ويامر فحنا لابو فيصل ملبّينا
لأمر الملك وامركم جينا لكم نسعى
عيبٍ علينا ان كان إنّا توزينا
ما فيه بيرق لأبوك الشهم قد فلّه
إلا وحنا تحت ظله مغازينا
من شانكم بالمعارك ما توقّفنا
وعن لاهب المعركة ما يوم صدينا
نارد ونفعل بإذن ربي ولا نخشى
ما همنا موت والا نجي حيينا
ثابت الى زعزع اسمه كلهم جولك
مجرب فعلنا مع فعل أهالينا
قول بلا فعل يا بن الجود مرفوضي
يشهد لنا يا طويل العمر ماضينا
من عهد فيصل الى ما عهدنا هذا
ما فيه يوم دعيتونا وعيينا
واليوم حاضر بحاضر قل ووجهنا
نمشي على ما تبي بالعسر واللينا
قدنا على ما تبي وتشوف بعيونك
ما همنا النار لو تحرق مواطينا
وكل القبايل تقول وتفعل الواجب
ناسٍ على طيبهم دايم معيينا
بالمملكة كلها شرق ومغربها
وجنوبها والشمال الكم موالينا
نعم القبايل ونعم رجال فعاله
دون الوطن كلهم لرضاك ماشينا
واليوم أذكّر براي ورايك النافذ
رايٍ لتركي بماضي وقت وسنينا
الحكم يا معرّب الجدّين ثنتيني
ياوي يا معرّب الجدّين ثنتينا
يمنا بها السيف تضرب عاصي المله
ويمنا على الشعب تنفق بالملايينا
ومفهومنا فيك ها الثنتين مجتمعة
وبك قبلهن خوف ربٍ له مصلّينا
وانت المحنّك ورايك دايم صايب
وامرك وطاعتك ما عنهن تغاضينا
وبلادنا غاليه ما يوم نرخصها
أم لنا كلنا فيها تربّينا
ومن عق يا سيدي جزاه مضموني
من عق لامه خسر دنياه والدينا
يا سيدي دارنا ما يوم نهملها
عن داعي الدار ماو الله تنحينا
عشنا بها سيدي بالعسر.. والشدة
وياما من اعشاب صحراها تغذينا
واليوم يوم انها صارت لنا جنه
ننسى كرمها ونترك خاينٍ فينا؟
نترك لمن فكرهم حرَّفته اعدانا
اعدا بلدنا لهم بالمال مر شينا
لا والذي يعلم الاسرار سبحانه
ما نترك الدار لو تمحا ذرارينا
دار ربينا بها والحال ميسورة
وعنها ندافع برمح ونوب سكينا
واقول ما قال ابوي بحفل فرسانك
خضنا المعارك ولابه يوم ذلينا
وسلاحنا بالفتيل وبندق مقمع
ولا ولانا يابو متعب معادينا
واليوم قوات وسلاح نفاخر به
وش لون نخشى شلل للدين عاصينا
تهابكم جملة الفرسان والقادة
وثعالب الليل تجي اليوم توذينا
سر ما يهمّك مدمر ليبيا الفاسق
عليه وامثاله الفسق تعلينا
ما عمر من دمر لشعبه مع بلاده
قد فاز يا سيدي بالكتب قارينا
إنه ومثله بإذن ربي لهم حسره
ولا هز سنجار بوم ينقر الطينا
سر وتوكل على ربك وتلقانا
جميعنا ارواحنا لك حق مهدينا
الى اتكلنا على الله ثم اطعنا له
إلى دعيناه منه العفو راجينا
ما همنا الخصم مهما كان ما ارهبنا
موحدين لربي وهو حامينا
يقدر بكاف ونون برمشة العيني
يدمر العالم الباغي وينجينا
أغرق لفرعون واهلك عاد والابره
يقدر بحرفين يهلك كل طاغينا
يمهل ولا يهمل اهل الشرك والبدعه
الى نصرناه ينصرنا ويحمينا
انتم ربيتم على السنة وما فيها
وانتم وحنا تعاهدنا بايادينا
على الشريعة وطاعة ربنا الخالق
نجهر بها والبشر تدري وتوحينا
رب الملا خصنا بكتابه الطاهر
خير أمة بالبشر للرشد هادينا
من شان نامر بمعروف وعن المنكر
ننها ولا همنا داع يداعينا
حرب للإرهاب نعلن كلنا معكم
لو كان نهلك وتنعانا نساوينا
ما والله نخون ربي يلعن الخاين
دون الوطن دونكم تفعل يمانينا
ارسل لنا ما تبي يا الشهم نمضيبه
وعار علينا إن كان انا تخلينا
"مدارات شعبية"