البارحة جتني على ما تمنيت
واخترت من جزل القصيد وبديته
امطر سحاب الشعر بيتٍ ورا بيت
قام يتقافى للورق واقتفيته
طرى عليّ الفيصلي ذايع الصيت
عبدالعزيز اللي ماغيره فديته
ماحدٍ يقول إني بمدحه تماديت
إلاّ بيقولون الوفاء ماجزيته
يا شبل يوم انك بجدك تسميت
أنا اشهد ان الاسم هذا حميته
يانجم يوم انك رقيت وتعليت
روحك على كسب العلا مستميته
ماهي غريبه ياولد خادم البيت
شربت منه الطيب حتى رويته
يحق لك باسم الفهد لا تعزويت
مجدٍ درسته من صغر واهتديته
ما خذتها في قول ياعل يا ليت
نذرت نفسك للعسير ورقيته
للخير في وجهك رسوم ومنابيت
ويهناك حبٍ وسط الأنفس بنيته
ويوم انها جتني على ما تمنيت
ياطيب حظي كان شعري قريته
"مدارات شعبية"