يا لله يا مخزي ابليس وهادي أصحاب الرقيم
وأهلكت عاد اللي تمادى غيها وفجورها
وأنجيت هود وساير اتباعه من الريح العقيم
احفظ بلاد المسجدين ومحتمين ثغورها
يا دارنا لك منزل في قلوبنا شانه عظيم
تدللي يا قبلة أمتنا ومنبع نورها
ذرّات رملك يا بلادي في الحياة أفضل نعيم
احب عندي من بساتين تعج زهورها
نفديك بالأرواح لا قابل خصيم مع خصيم
والكايدين الله يرجع كيدها في نحورها
أرض بعث فيها النبي وأمره ونهيه مستديم
وكتابنا المنزل عليه وسنته دستورها
حكامها تحكم بشرع الله ومنهجها سليم
ومنها العقيدة لأكثر العالم تمد جسورها
حتى أصبحت مضرب مثل للأمن من عصر قديم
مهما البغاة استهدفوها ما نقص من دورها
أمن الوطن بقيادة الرجل المحنك والحليم
والنبتة اللي شوكها يوذي يقص جذورها
نايف وزير الداخلية والزعيم ابن الزعيم
يسهر لمصلحة البلاد ومصلحة جمهورها
إذا دعا داعي الرياض يجيب داعيه القصيم
وكل المناطق لا دعاء الداعي سريع حضورها
والأمن واجب يشترك فيه المواطن والمقيم
ورجال الأمن اللي تعرض للسهام صدورها
يفضلون الموت في الواجب على العيش الكريم
بإقدامهم ضد الفئات اللي تجاوز طورها
بلادنا معروفها ما ينكره غير الغشيم
مخدوع من ناسٍ تبيّن حقدها وغرورها
الابن مد ري كيف يجرأ يطعن أمه في الصميم
وشلون يطعنها بعد شرب اللبن من زورها
أم تبادلنا الغلا والعطف والقلب الرحيم
من حقي أزعل من زعلها وابتهج لسرورها
كل القلوب الواعيه تستنكر الفعل الأثيم
اللي عبث باجساد معصومة وهدّم دورها
وش ذنب ذيك الأرملة في البيت والطفل اليتيم
طالت يدين الشر عايل بيتهم بشرورها
ياللي سلكتوا مسلك الإرهاب والفكر السقيم
من غاص في مستنقع الفتنة غرق في بحورها
خدمتوا الأعداء وأطعتوا كل شيطان رجيم
أسباب عميان القلوب اللي سمعتوا شورها
تقتلون المسلمين شيوخ وأطفال وحريم
واخوانكم يشكون من ظلم اليهود وجورها
طعتوا خفافيش الظلام اللي رمتكم في جحيم
تسوقكم للموت سوق وتختفي بجحورها
المجتمع كله نبذكم لا قريب ولا نديم
والقافلة في الدرب تمشي ما وقف مظهورها
لكنّ عودوا للصواب ان كان أحد منكم فهيم
قدام ضربة تنتظركم ما تطير طيورها
اللي في قلبه شك يرجع للصراط المستقيم
والنفس الأمارة يقر بجهلها وقصورها
الحق شمس واضحة ما حال دون الشمس غيم
والعلة المستعصية تعرض على دكتورها
تعرض على منهج هل السنة وتوجيه العليم
وأصحاب علم تنظر الأحكام من منظورها
وطاعة ولاة الأمر واجب والغلو مسلك وخيم
من طاعة الله طاعة الأمة ولاة أمورها
في ولاتنا ما نستمع همّاز مشّاي بنميم
يغتاب حكام البلاد اللي طوال شبورها
نجدد البيعة لقادتنا هل الراي الحكيم
الله يسدد رايهم درع البلاد وسورها
أقولها باسمي وباسم شيوخ ربعي من سليم
قوم نهار الحرب ما تعطى الخصوم ظهورها
وصلوا على الهادي محمد عد ما هب النسيم
واعداد دورات الليال أيامها وشهورها
"مدارات شعبية"