يا سيدي يابو فيصل وان تعزوينا
الشعب كله جنودٍ شانهم شانك
ولي عهدك يابو فيصل ابن اخينا
إن ميل عصابته ياويل من خانك
وسلطان بالجو يدعمنا ويحمينا
ونايف وسلمان مقدم جمع فرساتك
يادار حنا جنودك وإن دعيتينا
والله ليروى الثرى من دم شجعانك
يادار يا اغلى وطن يا عز ما فينا
أطهر تراب بهذا الكون باحضانك
يادار والله على ترابك تخطينا
نتعلم المشي ونقطف طلع بستانك
ياما لعبنا وسيّرنا وسجينا
ونشم فوح الخزام بسوح ريضانك
يامن على ترابها والله تربينا
والله نهلنا صنوف العلم باركانك
يادار يامن على الفطرة حفظتينا
نعز عزك ونترب خد من هانك
عهدٍ علينا بحاضرنا وماضينا
نفداك بالروح ندحر كيد عدوانك
من يدعي الدين ويفجّر مبانينا
ماهو بمنّا حشا والشرع برهانك
حكم الشريعة رضينا به ويرضينا
ومحدٍ حكم بالشريعة غير سلطانك
يادار عهدك علينا وان تعزوينا
نحفظ ترابك ونحفظ عهد من صانك
"مدارات شعبية"