هذا الوطن يا ضايعين التفاكير
الدار دونه ضد الإرهاب حنا
هذا الوطن يا هل العقول المغارير
نبع الشريعة من سنين مضنا
هذا الوطن يا هل الفعول المناكير
هنا هبط جبريل وحي وتعنا
هذا الوطن والشعب دونه طوابير
عيب علينا وجودكم في وطنا
الشعب واحد ما نعرف الجماهير
ما يدخله تفريق منا ومنا
حنا أمن من حد عرعر لخرخير
ومن الساحل الشرقي لغربي وطنا
حنا سعوديين بالشر والخير
ولا حدٍ يفرق بيننا لو تمنا
خرّوا وراكم لعنو ابوها الدناقير
في شاية الله كود تقفون عنا
أنتم سلكتوا غيرنا مذهب غير
ولحونكم ما هي تطابق لحنا
أنتم دسايس آكلين الخنازير
جرثومة نستاصله وانتهنا
يا مدعين إصلاحنا بالتقارير
وتمشون بالإصلاح في كل فنا
يا للعجب وشلون الإصلاح تدمير
وافعالكم للشر عمد تبنا
إصلاحكم يبيح ذبح المسايير
ورجال الأمن اللي بظله آمنا
وحتى المشايخ كفروهم بتزوير
وحكامنا اللي وفروا ما نتمنا
إصلاحكم ياتي بهدمٍ وتفجير
وديني بري منكم ولانتم بمنا
أنتم خوارج يا خباث التدابير
وحملاتكم ضد الشريعة تشنا
وديارنا ما لكم عليها معابير
الشعب دونه بالشهادة تغنا
لا بد ما نقضي عليكم بتحسير
في دمكم سيف العدالة يحنا
ما دام أخو نورة على الدار ويدير
كل السباع لهيبته يخضعنا
حكامنا والشعب خلفه طوابير
لهم الولاء والسمع والنصر منا
اللي على عز العروبة مغاوير
اللي ننام بظلهم وانتهنا
اللي صحيح إصلاحهم فيه تطوير
فيه المساجد والمدارس تبنا
ومستشفيات دون دفع ومخاسير
وباحدث معدات الدواء جهزنا
وعيونهم لأجل المواطن سواهير
والشرع فيها ماشيٍ ما تونا
والمملكة جنة لأهل نية الخير
ونارٍ على اللي فيه شكٍ وظنا
وحنا حرسها ضد شين التفاكير
هي دارنا وإن مت تبقى كفنا
وحنا سعوديين بالشر والخير
ولا حدٍ يفرق بيننا لو تمنا
"مدارات شعبية"