لا بأس يا سلطان يا نسل الأحرار
لا بأس يا طير الهدد طير حوران
الشعب يسأل والمحبين والجار
يسأل عن المقدام والقرم سلطان
سمعتك يا سلطان في كل الأقطار
طيب وندى وفزعات وانقاذ واحسان
سلطان له بالقلب منزل وله كار
الشاهد الله خالق الانس والجان
يا الله عساك بخير يا وافي الأشبار
ياللي خذيت الجود شاره وعنوان
جودك شمل عجز وأرامل وقصّار
تعطي ولا انته في عطاياك منان
مدات أبو خالد كما الغيث مدرار
عمّت ربوع المملكة وكل الأوطان
هو صاحب القالات فكّاك الاعسار
ريف الضعيف وريف ثكلى ويتمان
ولياجا نهار الحرب كالسيف بتّار
عمى الحريب وكل حاقد وطمعان
نعاهده بالله على حفظ الاسرار
دون الوطن نرخص مهجنا والابدان
نحمي حمى البيتين من كل غدار
المعتدي يجني ندامه وخسران
الجيش دون المملكة درع وأسوار
يرد كيد المعتدي كان من كان
يقودنا سلطان في بر وابحار
وفي الجو طيارات تقصف بنيران
ما همّنا من قام ينشر بالأخبار
الكذب خيبه والحقائق بتبيان
وما همّنا من دندن الطبل والطار
يقودنا للمجد والنصر سلطان
عدونا يفلت زمامه وينهار
افعالنا أكبر دليلٍ وبرهان
عدونا يلطم بخده ويحتار
ويضرب بخمسٍ سدس وأسباع واثمان
والله ما ياخذ ولو ركز مسمار
نفدي الوطن بالروح شيب وشبّان
تطوير للقوات في كل مضمار
وسلطان معنا بكل خندق وميدان
ومنّي تحية صادقة عبر الأقمار
وبرفقها باقة ورودٍ وريحان
تُهدى لسلطان البطل نسل كرار
والمعذرة إن كان بالقول نقصان
وختامها صلّوا على سيد الاخيار
على نبي الله من نسل عدنان
"مدارات شعبية"