لا باس لك يا بوي ألفين لا بأس
ليت المرض يا بوي جاني ولا جاك
من الخبر فكري تعومس تعوماس
أمشي ورجلي كنها فوق الأشواك
يا سيدي يا طيب الأصل والساس
افداك راع الشعر والشعر يفداك
حبك بقلبي طاغي ما له قياس
من حيث ما ترحل فؤادي تقفاك
اضيق من ضيقك وتتضايق الناس
ما أنت رخيص عندنا الرب غلاك
يعجز عن التعبير حبر وقرطاس
قدرك رفعه الله من فوق الأفلاك
بشوفتك ودعت انا الهم والياس
الحمد لله طبت والرب عافاك
يا حي هالشوفه ويا حي هالراس
من كل سوء الله يحفظك ويحماك
تروي كبودٍ من عنا الوقت يباس
غيثٍ على شعبك وعوق على عداك
انت المطر ريح المطر عطر الأنفاس
هلّت تباشير الحيا في محياك
رمز الكرم غصبٍ على كل الأنجاس
جزل العطا عن مدة الهزل حاشاك
نقول لك سلطان من قلب وإحساس
مرحوم عودٍ بالسلاطين سمّاك
الشعب كله قال لا باس لا باس
افداك انا والشعر والشعب يفداك
"مدارات شعبية"