ليت العربية تودي على الكيف
أشوف سيدنا وينساح بالي
زيارته حق وتأخيرها حيف
وحنا نعد أيامها والليالي
نبي زيارة ظل شعبه عن الهيف
سلطان لا عدّوا جبال الرجالي
سلطان سلطان الحِكَم والتصاريف
رجل القيادة والفخر والكمالي
لطم الخصيم اللي براسه زعانيف
مثل البحر كان ألتطم ما يبالي
من عنترة العبسي صلابة وتخويف
ومن حاتم الطائي عطايا جزالي
ومن معن حلمٍ ما تهزه عواصيف
راسٍ كما ترسى رواسي الجبالي
تعرف به الصيفات من غير تعريف
كلٍ يبي مثله وياهم ملالي
يالله يا منشي المزون المراديف
يلي بحكمك ينثر الماء الخيالي
تنجيه من كل العثر والصواديف
ويبقى على الشعب السعودي ظلالي
درعٍ يعدي لسيوف المراهيف
وقصرٍ يذري عن هبوب الشمالي
يلقون بأطرافه برادٍ نفانيف
وعن الشتا حصنٍ حصيناً وعالي
ريفٍ على شعبه إلى كمل الريف
يسند لهم بالمال ولا الريالي
أبو اليتامى والضعوف المهاجيف
عينه لهم فطنة وقلبه حلالي
تلقى الحمايل والرجال العواريف
تدهل لديوانه كرام السبالي
وبيته لأهالي نجد منصا وتشريف
مضافتن تجمع لصيلٍ وغالي
تم الكلام ولا لحقني تكاليف
في مدح شيال الحمول الثقالي
"مدارات شعبية"