الله ولا غيره إله وندعيه
ابه الفرج فالضيق والاستعانه
ما خاب من يرفع له ايديه يرجيه
اللي شفالي سيدي في مكانه
ساعة وقف يمشي على كبد رجليه
فزيت واقف كن ماني تكانه!!
هلت دموعي والحشا جاب خافيه
وسجدت لله الولي جل شانه
سجدت له والثوب دمعي مغطيه
اشكره واثني له عظيم امتنانه
سلطان يا جعل الصواديف تخطيه
عن المرض يا ليت عنده حصانه
لو الألم يعرف فعوله وماضيه
والله ما يطرح عليه الميانه
تكفين يا جدة على الصدر ضميه
ردّي له اللي قد عطا من حنانه
تكفين يا جدة تروّي وداريه
امانتك يا كبرها من أمانه
هذا الكريم اللي حميده مساعيه
هذا الوفي اللي شهد له زمانه
هذا الذي بعد الولي نلتفت فيه
شعبه ينوّم لا تنوّم وزانه
كل القلوب اللي بها دم تغليه
ما فيه قلب إلاّ.. وله فيه خانه
ولا فيه عيناً ما تمنى تراعيه
ولا به كيان إلاّ بحضرة كيانه
كل المعاني تنحصر في معانيه
ترقا على الهامات هامة طمانه
كم من يتيم كفكفت دمعه أيديه
وكم من مريض شاف جرحه وصانه
وكم واحدٍ ذا الحين فالدرب ناصيه
هذا شعب رجله وهذا حصانه
أي والله نحبه ونشفق ونبغيه
يرجع لنا من بعد ما الله عانه
اشتاق له قصره وشعبه يناديه
وبالشوق كله محترينه اخوانه
يا زين شوف البشت لا صار كاسيه
مع بسمة مقرونة في ثمانه
ناقف معه وليا بغى الدرب نمشيه
وليا نطق نسمع نوادر لسانه
نوادر من تاه منّا تقديه
أغلى من الألماس مع كل دانه
منها تعلمنا الوطن كيف نحميه
كانه نواه اللي طمع فيه كانه؟؟
ومنها توحد صفنا في مباديه
ملعون من تطري عليه الخيانه
يالله تديم العز وتعز راعيه
ربي طلبتك وانت معطي جنانه
عبدك وابن عبدك وفرضك يصليه
لا حل ذكرك قام يرفع بنانه
"مدارات شعبية"