يقول من هاله خبر شين واحتاس
من صورته في النفس أحدث ثلومي
أودع عروق الدم بالجسم يباس
والعين عيت طول ليله تنومي
اذهل وشتت فكره وعاش هوجاس
في يوم وصل الشر مبنى حكومي
دعا وناجى ربه بصدق واحساس
احفظ وطنا والجنود القرومي
وانصر حكومة طيب الفعل والساس
فهد فهد يا جعل عزه يدومي
وابطل مكيدة كل حاقد وبلاس
اللي بشره يعتبرنا خصومي
فكره سقيم وزاده احباط مع ياس
موت الضمير وراح علمه حلومي
زاد وتمادى صار للدم غطاس
وخبث النوايا فوق صدره وسومي
ذليل نام بوهم واصبح بوسواس
يلعب به الشيطان في كل يومي
وانساه ان الدار من دونها ناس
اولاد مقرن في سماها تحومي
وفوق ارضها شعب بهم يرفع الراس
ولحدودها جيشٍ قوي العزومي
العدل مبنى والشريعة لها ساس
منها الأمن وصل الجبل والحزومي
ومن خيرها عشنا بفي ونسناس
ومن فضلها نلبس جديد الهدومي
والا انت يا اللي كنت تحلم بمجلاس
فوق ارضها اليوم ما لك لزومي
اغضبت ربك بانضمامك للانجاس
وضيعت دينك والأهل والسلومي
لكن بعزة خالق الخلق اجناس
ان ينقلب من بردها لك سمومي
ومن كان مثلك خاب يبشر بالإفلاس
وانه من الخيرات شخص محرومي
مشاعر سعودي تغيظ من خساس
شقوا عصا الطاعة ومنهم يشومي
وفي ختامها صلى على خير نبراس
على النبي اللي رؤوف رحومي
"مدارات شعبية"