البارحة ما سلهم الجفن برقاد
هنيكم بالنوم ياللي تنامون
ما طاب لي مشرب ولا طاب لي زاد
وحالي بداها النقص من دون في دون
زرت الطبيب وجرّب دواه ما فاد
ومازال جرحي بين الاضلاع مكنون
مخفيه عن واشي ومبغض وحساد
صبري عليه اهون ولا عنه يدرون
شذابة العرقوب موذين الاجواد
ما يستحون ولا من الله يخافون
اللي تشيل قلوبهم غل واحقاد
وفي سوق قيل وقال باعه ويشرون
الله عن يوم يشوفون الانكاد
وباعمالهم يوم القيامة يجازون
لو طالت الدنيا ترى فيه ميعاد
باليوم والساعة محدد ومضمون
لا حان وقته ما نفع فيه رداد
لو تجتمع كل البشر ما يسرون
ما دامت الدنيا لشداد ابن عاد
ايضا ولا دامت لكسرى وقارون
يا ما بها من ساد مقدار ثم باد
ناسٍ بها تنزل وناسٍ يشدّون
اقفت على حكام وملوك واسياد
ما كنهم كانوا على الارض يمشون
ويا ما لحقهم من جماعات وافراد
الباقي الله والمخاليق يفنون
تملي لنا الايام والموت حصاد
ولا نأخذ العبرة من اللي يموتون
لا تحسب الدنيا تحداك بعناد
ولا تقول ممشاها على غير قانون
يديرها الوالي على كيف ما راد
بأمره يسيرها على الكاف والنون
ياالله يا معيد الليالي والأعياد
يا من يدير بقدرته واسع الكون
الطف بنا واغفر لنا يوم الاشهاد
يوم الحساب ويوم كاسب ومغبون
