يا وطنا يحفظك رب البريه
الكريم اللي على عباده يجودي
والخزي والعار لافراد الخليه
شلة التخريب خيانة العهودي
الغجر زمرة فقيه ومسعريه
الطغاة المجرمة جرب الكبودي
بالكهوف المظلمة تصدر وصيه
يفتي الدجال وينفذ حقودي
بالجهاد من القصيم اليا العليه
حسب توجيهات شارون اليهودي
كل جحرٍ فيه تنظيم وسريه
من طواغيت التطرف والجحودي
يقتلون الابرياء غدر وخطيه
والبيوت العامره تصبح وقودي
بالغدر كم راح من نفس زكيه
والارامل غير الايتام الشهودي
سود الله وجه الانذال الرديه
يتبعون المنحرف من غير فودي
ما يهزون الثقه والمعنويه
الدشير اللي تقاد ولا تقودي
الوطن دونه سلاطين قويه
قادة الإسلام والشعب السعودي
بالكتاب وسنة الهادي نبيه
شرع رب البيت ما هو بالبنودي
عزك الله يا وزير الداخليه
انت سور امن البلد قفل الحدودي
في ظلالك ترقد عيون الرعيه
والعيون الساهرة لاجل الرقودي
تلتهب شقر الحرار الصيرميه
كل مجرم لا ذكرهم ما يعودي
الرجال أهل الشجاعة والحميه
في ميادين الشرف مثل الاسودي
يا طويل العمر لارجالك تحيه
من مواطن للكبار مع الجنودي
يفتخر باللي مواقفهم جريه
كل ما زاد الخطر زادوا صمودي
العيال اللي تدوس النار حيه
ترخص الاعمار لاهاب الشرودي
تستحق أعلى وسام العسكريه
والحوافز والرتب والشكر زودي
