يا سيدي هنّيت نفسي واهنيك
وبالتهنئة عمّيت كل الجزيره
وعن كل ما تشكي عسى الله يعافيك
ويكفيك من شر الامور الخطيره
على السلامة غالي الورد نهديك
ونشرح به اللي خافي بالسريره
يا راعي البيضا افعولك تناديك
زرعٍ زرعته بيّن اليوم خيره
زرعت بقلوب البشر طيب طاريك
لين شربوا حب الدفاع ووزيره
عيونهم في كل لحظة تراعيك
وعمّت بشايرهم على كل ديره
وكل الدفاع بما حصل لك يواسيك
جتك التهاني من جموعٍ غفيره
من عادتك بالجود تبسط يمانيك
وتوصل حبال اللي حباله قصيره
يا سيدي سلطان عزٍ نماريك
انته ذرا للجيش وانته اميره
عسى الولي عنا بالاعمال يجزيك
ويشيل عنك من المرض كل حيره
ويديم عزك يابو خالد لراجيك
وترجع لنا تكمل شرف المسيره
