نحمد الِّلي زال كرب الهمام ابن الهمام
الأمير الِّلي على قلوبنا كله أمير
زال باس وفرحة الناس شاهد للكلام
دامت الأفراح للدار والفال السفير
لك يا سلطان المحبه وسلطان الكرام
يالأمير الِّلي للأفراج في وجهك بشير
الولاء وصدق النوايا تشرف بالسلام
كل عام وشاهق المجد يفخر بك بخير
يصهل المعنى بعزٍ له أفعالك وسام
ما أعتلى صهوة جواده بماده لك خشير
يابن من وحَّد بلاده بمجرود الحسام
يوم هلل وانتخى حقق الحلم الكبير
أبو تركي هد بالنور بنيان الظلام
قال شرع الله هو الحكم مالي شرع غير
سيدي يهناك صافي غلاك مع الأنام
من بغى يوصفك يا سيدي فكره يحير
أشهد ان الناس ما هيب في حبك تلام
السعد من وين ما سارت ركابك يسير
ضحكة حجاجك كريمه مثل وبل الغمام
وغيث جودك شاملٍ للكبير وللصغير
سيف صارم بالعدالة وللمخطي كعام
ملتجى مأمون باليسر واليوم العسير
أربع جهات أرض الإسلام يالحر القطام
درعها بأمر الفهد بالرجال وبالذخير
ياردون الموت لجل الوطن ورد الحيام
كل شبلٍ يهدي الروح باليوم الخطير
والقيادة لأبو خالد إلى ثار الكتام
مودع الشامخ بعيلاته يعوّد حسير
السياسي لافتل رأي نقضه ما يرام
روّض العاصي ولو كان شره مستطير
أكبر وسام الدول له شهاده وحترام
وسيدي في كل ما يرفع الهامه جدير
كايدٍ يفلج مكايد بعيدين المرام
من وراهم يبعد الشوح ما شاور مشير
وفي مجال الخير سلطان لأهل الخير إمام
طايلٍ بالجود شبره ويدعى له بخير
وطايرات تنقل اللي مريضٍ باهتمام
كل شيء لراحته بأمر أبو خالد يصير
ومركزٍ للقلب عمّر باسم جزل المقام
ومن ورى حد الوطن فيض فزعاته كثير
كم وكم بالأرض مسلم نفذ صبره مضام
ما له إلا همّه بليله الطايل سمير
أفطر بعلم الفرح من عقب طول الصيام
صار له سلطان عقب الله الواحد مجير
