مبداي باسم اللي خلق كل الأمه
ربٍ معز مذل عالٍ مقامه
عساه يجعل لي على الحق يمه
ويدلني للخير والاستقامه
عندي نصيحة كل عاقل تهمه
والجاهل إن ما فاق يفتل خطامه
ما يقبل الارهاب رجل بذمه
وحنا سعوديين ولنا كرامه
حنا سعوديين نخوه وهمه
لنا الشجاعة قلب والعز هامه
متكاتفين وبنينا ما ندمه
ولنا على الارهاب حزم وصرامه
واللي علينا دخيل فكر ودمه
ما هوب منا لو لبس له عمامه
ما هوب منا لعنبو من يضمه
عار على الإسلام وأكبر ملامه
عار على الإسلام وأكبر مطمه
مرت على الإسلام لين القيامه
ناس تسموا به ولا هيب يمه
ضلوا لو القرآن حفظوا ختامه
بعد انحرف تفكيرهم بان سمه
واسباب ذلك حقدهم والغشامه
ما الله هداهم يسألون الائمة
اللي تميز عن حلاله حرامه
ائمة تقرأ الحديث وتتمه
والكل منهم نقتنع في كلامه
ونص المعاهد يعصم الدين دمه
نصٍ صحيح وواجب لك التزامه
واللي علينا دخيل والشر همه
ما هوب منا لو لبس له عمامه
