يالله يا رب المخاليق اجمع ويا ذا الجلاله
فوق عرشك مستوي يا راعي الاسما العظيمة
حي دايم جلّ شأنه كليونا في ظلاله
بيده تموت العباد ويحيي عظام رميمة
العطا منه له المنه وشكري والثنا له
الشكر له والثنا له والنعايم من نعيمه
والرجاوي والدعاوي واللجا والملتجا له
كاشف الغمة عن الامة ولا يرضى الظليمة
اطلبه يحفظ وطنا بالكتاب وبالعداله
يحفظه من كل شر وللستر جعله يديمه
قال من يبدع بيوت الشعر لا حصّل مجاله
شاعر خوفه من الرحمن والنية سليمة
ما حداه الا جوابٍ ما عرف وشهو سؤاله
مسلمين في قتل مسلم صداقتهم حميمة؟؟
كيف مجرم يدعي ويقول دينه راس ماله
يدعي الاسلام وأنواع الجرايم في صميمه
يعقب ما ينتمي الاسلام له ولا انتما له
ذا ومثله باذن ربي للجحيم اكبر وليمة
الله أكبر يا قلال الدين عدوان الرساله
ناوينٍ تجعلون ارض الحرم مسرح جريمة
لكن الله رد كيد اللي نواها في حثاله
وافشل الخطة وحولها على راسه هزيمة
ويش ذنب اللي توفى كل من شافه بكاله
ويش ذنب اللي اصيب ولحقه اضرار جسيمه
من بعد ما صار وسط العاصمة زدتوا جهاله
تو باقي ما صفى جو الحزن وانزاح غيمة
وتو ما جفت دموع شويّب ماتوا عياله
وتو ما فاقت من الغيبوبة الام الرحيمة
فاز فيها واحدٍ دون الوطن كسب الجماله
واصبح وليده يتيم واصبحت بنته يتيمة
منهج غير الشريعة عزتاله عزتاله
ناهجه خلا الدروب القادية والمستقيمة
واشتعل قلبه على الاسلام بل زاد اشتعاله
وغرّر بكم واحدٍ عقله مثل عقل البهيمة
اختبص عنده حرام الشي لين اصبح حلاله
يقتل المسلم وذبّ الذعر بنفوس المقيمة
قصده يزعزع الامن ويفكر انها بالسهالة
والوطن دونه رجالٍ عندها اصرار وعزيمة
والله انه ما يمسه لو طراله ما طراله
يبشر بسيف يقص الراس والدولة حكيمة
الوطن يا للي نويتوا بالقشر دونه رجاله
لو تروح الروح ما للروح دون الدين قيمة
ساعة الصفر ابتدت والمفسد استوجب قتاله
والحركات اللي يسوونها صارت قديمة
يا شعوب المملكة يا أمة محمد وآله
يا حكومتنا ابشري بالخير يا مال الغنيمة
كلنا نستنكر اللي صار من ناسٍ حثاله
ديننا متبري منهم عساهم في جحيمة
ودام شرع الله فينا فالوطن يا طيب فاله
ومن نسى دينه عواقبها على شعبه وخيمة
والله يعز الوطن ويظل من حن في ظلاله
من نوايا اللي نوا دار الحرم ببشع جريمة
