يالله اني في رجاك وفي حجاك وفي ظلالك
يا كريم ويا رحيم ويا غفور ويا ودودي
يا رفيعٍ في مقامك يا عزيزٍ في جلالك
اطلبك يا الله وأسبح في الركوع وفي السجودي
ارحم اللي لو تطوفه رحمتك بيكون هالك
في نهار ما يسره لا عيال ولا جدودي
وجعل حظه في دروب الخير وأهل الخير سالك
لا يميل ولا يطيح ودايماً يرقا سنودي
عبدك اللي ما يبي إلا يا إله الكون فالك
ما يبي فال الخلايق فالها ما منه زودي
شاعرٍ هاضت شعوره بعدما هو قد شكالك
شد قافه ثم صاغه وصرفه صرف النقودي
يا هجوسي زوديني كل ما جالك مجالك
بالجزايل من بيوتك والهزل ما فيه فودي
وكل منهو شاف حالي قالي وش وهو جرالك
كن في قلبك طعون وكن بك علة كبودي
وقلت يا من جيت تسأل لا تكرر لي سؤالك
السؤال اللي سألته من جنابك لا يعودي
صابني شيٍ دهاني كيف بصبر وأتمالك
نفس صايبها قهر من فعلت النجس الحقودي
قام يعبث في بلدنا وشلته خلفه كذلك
كل جاحد خلف جاحد تتبع الكلب الجحودي
يا المخرب يا المفجر ديننا ماله ومالك
تدعي الإسلام لكن فعلتك فعلت يهودي
ساعيٍ للزعزعة إلين زعزع بك خيالك
ثم غدا بك وأنت غادي مثلما هاك الشرودي
أنسلب عقلك وفكرك ثم شوش لك ضلالك
تقتل النفس البرية ظلم وأطفالٍ رقودي
تحسبٍ جوك بيصفا مير جوك ما صفالك
انقلع منا ولا لك في الوطن هذا قعودي
تحسب إنا نأيدك مير حنا عندنا لك
كل سيفٍ ينسف رقاب متعدين الحدودي
ولا تفرقنا ولكن ديرلي باالله بالك
كل شخصٍ في وطنا يفتخر انه سعودي
وكان تبغا العلم مني إخذها والعلم جالك
القيادة حق فهدنا والفهد خلفه فهودي
ولا يحرك شعرةٍ في الفهد والله هبالك
وأبو فيصل له عضود وكلبونا له عضودي
ولابغينا ما بغينا يا قيادتنا بدالك
القيادة لك قيادتنا وحنا لك جنودي
