يامدّعي للصلح والحق والدين
يامغفّلِ تمشي بريموت.. غيرك!!
وش ذنبهم ناسٍ تقتّل مصلين؟!
وش ذنبهم وبليس معمي بصيرك
ناسٍ تحج البيت وتصوم وتعين
ياكيف تقتلهم ويرضى ضميرك؟!
وش ذنبهم ناسٍ تقتّل بريين؟!!
وش ذنب طفلٍ ميتمه من نضيرك؟!
وش ذنبهم يابارد القلب والعين؟!
وش هو جوابك يوم تلقى مصيرك؟!
شوّش عليك بليس واعداء المسلمين
اللي على حب النشايب.. تثيرك
ماهمّهم دينٍ ولا مذهبٍ زين
ولاهمّهم تقتل ولدك.. وقصيرك
ناسٍ على زرع الفتن مستمرين
تبحث ورى مصلوحها لو تهيرك
وان كان معميتك طبول الشياطين
لا تسل سيفك تغرسه في نصيرك
دقق بفكرك قبل وزن الموازين
دقق بفكرك.. يامغفّل نشيرك
