البارحه حاير والهم يلعبي
كلش تبيّن ولا به شي متغبّي
ما غير أفكر ببنتٍ قاضبه جيبي
بنت احدعش تنتحب وتقول وش ذنبي
ساعة بكت وشهقت حسيت بضلوعي
مرٍ تقطع ومرٍ ينقطع قلبي
تقول قصوا جديلي وحرقوا جسمي
شذّاذ الآفاق كيف اغتالوا لعبي
خذوا كتابي وممحاتي ومرسمتي
وعن درب أمي وأبويه ابعدوا دربي
ما همني وش جرالي لكن اقراني
اخاف ترويعهم من اجنبٍ عربي
شذّاذ الآفاق ذولا قصدهم فتنه
الدين منهم برئ وفكرهم سلبي
واللي يبرر فعايلهم ويتعاطف
لا شك عن فعلهم راضي ومتربي
واللي خذى الجانب السلبي ولا ينطق
وش نفع فتواه في زادي وفي شربي
وشيوخهم واحدٍ فالشرق في جحره
وفالغرب معتوه بالاحقاد متعبي
تقول بلّغ عيال العود بلّغهم
ناصرهم الله على من منهجه كذبي
وشعب تحت راية التوحيد آزرهم
آمين انصر رجال الأمن يا ربي
وقالت قرت مع ابوها شعرٍ منوّل
(السيف أصدق إنباء من الكتب)
