لا.. لا تسمّي يا الارهابي بالإسلام
الدين ينفض من سواتك شليله
وش موقفك بين الأرامل والأيتام
وش عذرك اللي فيه تشفي غليله
مسلم يصلي ينجزي منك باعدام
حرمته اطفاله وشايب يعيله
اثم على كتافك وش تقول قدام
لا قيل ذا قاتل وهذا قتيله
وحشية دلت على نية اجرام
قصده يهز الأمن وإلا يزيله
بدري ولا ظنك تشوفه بالأحلام
للدين ثم الدار راسك تشيله
الله رزقنا بالبلد خير حكام
حكم الشريعة ما رضوا في بديله
صاروا على بلاد الحرمين خدام
معدلين اللي يضيع دليله
فجرت بالمحيا على ناس صيام
وتلت ببريده وكفك طويله
ومبنى المرور اللي تهدم تهدام
موّت فيه الناس ويش الحصيلة
وجدان طفلة عمرها عشرة اعوام
راحت وشايبها فزع من مقيله
صحّيتوا العالم على احزان وآلام
وافزعتوا اللي ماشي في سبيله
الله يفضحكم على روس الأنام
ويجدعكم الله بين يوم وليله
