يا هل القلوب اللي بها الشر مدفون
ودلالكم للشر دايم مباهير
بارواحكم لبليس قمتو تفادون
أعماكم الشيطان عن يمة الخير
صغار سن وتوكم ما تحيطون
تفكيركم وجه على يمة غير
في غفوة ما ظن منها تفيقون
ختو من التخدير فوق المعايير
غسلت ضمايركم وقمتو تعادون
على القشر والسو عميان أباصير
تزعزعون من الوطن ما تحسون
تزعزعونه كل يوم بتفجير
سفك الدما والذبح به ما تبالون
الدين دربه سند وأنتم محادير
وش ذنب ناسن من سببكم يموتون
عطوني لذبح المسلمين تبرير
يا ليت من شيطانكم تستعيذون
لابد بأنفسكم تعاد التفاكير
توبو مدام لكم مجالن تتوبون
اخشو ظلام القبر واخشو زمهرير
ان ما حسبتو يوم داين ومديون
ترا مكاسبكم عذاب ومخاسير
اقفوا عن أعمال القشر لا تمادون
أي التمام لصف وأي الشعاثير
حنا بدار سلام والشرع مسنون
نعيش في ظل الملوك المغاوير
