يا الله إنك يا كريم الوجه يا ربٍ جليل
يا عليم بالخفايا والنوايا والزلل
تحفظ الإسلام وأهله والوطن عن كل ميل
من شرور عداه وعقولٍ نما فيها الجهل
ما يقر إسلامنا وأخلاقه الفعل الضليل
من يصدق برمضان وبالرياض اللي حصل
من يصدق فعلة الإرهاب بالشهر الفضيل
يرهبون ويقتلون الطفل والشيخ الكهل
يدعَ الإسلام من سواه لا بده هبيل
من يقول المسلم اللي يقتل مسلم بطل
وباي شرع إنه حلال دم من عاهد يسيل
وباي شرع إنه يفجر آمن جا للعمل
ومن يقول إنه حلال لا قتل عابر سبيل
اشهد إن إسلامنا منها براء ولا يزل
وفي فساد الأرض والارهاب والفعل الرذيل
باي دين وباي ملة قيل لك انه يحل
المنازل دمرت في لحظة صارت هليل
أشهد إنه شي يدعو يا جماعة للخجل
ومسلمين اموالهم من هدرها ويش الحصيل
ومن خراب الحرث بالديرة وتعطيل النسل
ما خبرنا مسلم عاقل رضى الفعل الهزيل
كل عاقل ينكر اللي حاصلٍ واللي فعل
ودون ذنبٍ راحت ارواح سبب فعلة سفيل
ودون ذنب اللي بقا مرتاع ودموعه تهل
جَهل تفكيرها مغسول عز الله غسيل
ومن رجع للرشد وإلا وصله الشغل العجل
جاهلٍ ما صف ريشه يحسب الدعوى هديل
قام يفتي يحسب التكفير بالأمه سهل
جاهلٍ ما شرع الله قام بلسانه يزيل
والولد توه على دنياه بأولها يطل
بالدساسه والخساسه ذا يحط وذا يشيل
شوهوا دينٍ نزيه من سبب قل العقل
وديننا محمي ورب البيت في دينه كفيل
الله اللي نزله والله على حفظه كفل
وديننا بأرواحنا نفداه ما دونه نحيل
اشهد إنه عن جميع اعداه ابعد من زحل
ويش فرق اللي جرا عما جرا بأرض الخليل
من يهودٍ صورة الإرهاب فيها مكتمل
ولا يضرك يا وطنا حذفة الجاهل بليل
بإذن رب الكون تبقى راسي مثل الجبل
يا وطنا مخلصين لك ولا فينا ذليل
لك عيون ساهراتٍ ما تبات بلا كلل
دونك رجالٍ توقف مارضت فيك القليل
بالشدايد واقفين لك على ساق ورجل
لك جنود جاهزين والله الشاهد وكيل
بالسلاح وبالذخيره كل نوع ومن شكل
يا وطنا بالأمن والله ما جالك مثيل
ولا يغير بامننا ببلادنا لعبة ثعل
والمصايب كاثراتٍ من قريب ومن عميل
اختلط هالوقت ريح الجيف مع ريح النفل
صار ابو وجهين يضحك من عقب قلبه عليل
والعدو لو هو تخفا يكشفه طق الطبل
ملمس الديبان لين ما عرفنا بالخليل من الدخيل
طيب القالات نسمع ما يوجه من جمل
قاصر النظره يسوي لليهود اكبر جميل
فرح العدوان سافل يحسب الدنيا همل
مثل من خلى رحوله في طريقه والصميل
لين مات وكل جد ما يجي فيه الهزل
وكل درب سالكه تايه على مثله طويل
والغشيم اللي مشى بالدرب ما وقف وسأل
والقيادة عزها الله ما نبي فيها بديل
والعهد مع ناصرين الدين بالحيل انفتل
طيب الله قبر عودٍ قام بالسيف الصقيل
من عقب ما هي شتات وحدة لم الشمل
قوم الإسلام ابو تركي وهو خير الدليل
وابتدا بالدولة اللي سادها سلم وعدل
وانتهت بأمن وأمان وحل به خير فضيل
والجهل ولّى وصار العلم من خير السبل
بالسياسه والجيوش اللي بها رجلي وخيل
والسهر ومكابد ما بين حل ومرتحل
نوب بالتخطيط والحكمة ونوب له صهيل
والصبر والباس وعزوم قوا فيها الأمل
جابها عبدالعزيز ولا بغت غيره حليل
ما تجي بالسهل مار الليث للشده صمل
وخلّف عيالٍ على دربه كما حد السليل
واسلكوا بالدار نهضة ماحدٍ منهم بخل
باذلين جهودهم للخير من جيل لجيل
ورفعوا عزة ومجد الدار واللي به نزل
ودعموها بالحماية ما حدٍ يقدر يعيل
بكل دار ينشرون الدين ما جاهم ملل
ونحمد اللي خصنا بالخير من عقب المحيل
وخصنا برجال حكمة تبذل الجهده بذل
طول الله عمر ابو فيصل وفي ظله نقيل
الحكيم اللي يوقف للمصاعب ما زمل
بالشجاعة والسياسة ملهم فيها جبيل
صيرمي للعقد ما تكلفه يا ما حلل
خادم البيتين دعمه في سبيل الله يهيل
أمة الإسلام وأهل الدين ما عنها غفل
كم عدو مرتكن له حط في كبده غليل
الفهد يا كم راس داسها وسط الوحل
وولي العهد حيدٍ ما يوقف له قبيل
طير حر له مخاليبٍ مضاريبه جمل
ابو متعب محفي الأقدام حلال الشكيل
مبعد النظره صليب الراي يضرب به مثل
وين تلقا عقب عبدالله الي ثارت عقيل
والبحر لا صك موجه ما نفع كثر العذل
وسيفنا سلطان درع ما يعرف المستحيل
نايب ثاني سليل المجد للحكمة جبل
وبأمننا نايف قوي الباس لو حمله ثقيل
هو وزير الداخلية لا سطا الطاغي نكل
ومثل غيثٍ للوطن بالخير غاد له هميل
عارف للواردات وللقضايا كم فصل
ومن عقب ما صار خل اللي يولع بالفتيل
مثل ديك قام يذن مار وقته ما وصل
دارنا وامانها ابعد عنه من نجمة سهيل
وكل كلبٍ قام ينبح فاتلين له حبل
كيف نسمع واحد حط اليهودي له زميل
يوقظ الفتنة وبيدينه يولعها شعل
حيةٍ وسط الثرا وسلوكها سلك الأميل
والهبايب يوم تذري تظهر اللي بالرمل
رايح يومي براسه عندهم مثل الحسيل
والرجال تميز الطيّب وتدري بالنذل
وكل جاهل يوم غره راح يومي بالشليل
كنه اللي تاه في دربه ولا ظنه بتل
ودارنا دار السعود رجالها حيله وحيل
مجدهم معروف بالألماس يكتب في سجل
والوطن عزه من اللي ماحدٍ فيهم بخيل
والذكر يبقى مع العالم وكلش له اجل
ولا يضر المملكة من قام بالتهمة يكيل
ولا يضرك يا وطنا حذفت جت من طفل
والصلاة اعداد ما أهمل من هماليل المخيل
للنبي الهاشمي المصطفى خير الرسل
