لا والله الا رحت فيها ماعلي من العلوم
اكلتها نيّه من الاحباب ماهي جايده
وقعت مدري ماوقعت الامر ماهوب محسوم
لكن ابي درب السلامه والسلامه كايده
قلبي يحذرني وعيني تلتفت يم النجوم
حسبي عليها علقتني فالغزال القايده
الدرب موحش والسما ظلما وتكسيها الغيوم
والنفس حرفه دوب أحايلها مغير مصايده
كثر التردد والتصدد ماقضى لحد لزوم
في وقتنا والا على مر العصور البايده
واليوم انا ملزوم اغامر والغنايم فالعزوم
حكمة وانا صدقتها في مجتمعنا سايده
للرجل ياهل المعرفة فالعمر يوم عن الف يوم
اما بلغ ذروة سنام المجد والا حايده
ابا اضرب القاسي براسي واسبح الغبه واعوم
اما غديت مع البحر والا رجعت بفايده
مانيب طول العمر عن مالذ للنفس محروم
يا الذ واطيب لي من اللي حط فوق المايده
انتي هواي انتي غذاي انتي ذراي عن السموم
انتي على كل البنات المترفات الرايده
انتي علامه فارقه يابخت من حظه يقوم
انتي وانا مسؤول عن ما اقول عنهن زايده
