سلام يا حاكم ثريا الجزيرة
يا خو فهد يا منبع الجود والطيب
سلام يا نطاح وجه المغيرة
سلام يا مدرك جميع المطاليب
من شاعر ما كل شيء يثيره
ومسخر شعره لمدح المعازيب
يا خو فهد مدحتك بر وبريره
وطاعتك عندي من كبار المواجيب
يوم كل يرفعه صيت أميره
نطلع بصيتك في طوال المراقيب
وانت الأمير اللي على الناس خيره
وليا دعا داعيك كل له مجيب
ومجدك كبير ومنجزاتك كبيرة
وسيفك تهدي به جميع الأصاعيب
في وسط نجد وفي ربوع الجزيرة
صارت عيال الضان ترتع مع الذيب
ومزودك ربي بنور البصيرة
والفقه والحكمة وسيد الأساليب
يا خو فهد جودك وصل كل ديرة
يا للي فتحت الباب والقلب والجيب
سلمان لك منهج ومبدأ وسيرة
قمة وفا ما فيك شك ولا ريب
سلمان قول وفعل نخوة وغيرة
صدق وعمل وانجاز واجراء وترتيب
سلمان لا جات الظروف الخطيرة
في روس الاعداء تحكم الضرب وتصيب
سلمان حلال الأمور العسيرة
لا جنبوا عنها كبار المناصيب
في عينك تصير الكبيرة صغيرة
من كبر مفهومك وكثر التجاريب
سلمان جوداتك لشعبك كثيرة
غر عليها تطلع الشمس وتغيب
امير نجد وصيتك اغلى عبيره
يعني مثل ما قيل طيب على طيب
وصلوا عدد ما هبت المستثيرة
على رسول غرب الجهل تغريب
