وغفر له وأسكنه فسيح جناته
سر يا قلم واكتب بيوت منقاه
من هاجس كنه تدكه جنازير
من هاجس عرقا على الكبر عرقاه
لفراق إبو نافل زبون المخاسير
غاب الرفيق اللي يسليك منصاه
اليا تنصوه القروم المناعير
في مجلسه تلقى الشحم دوم تلقاه
وعود يعروج والدلال المباهير
حل القضاء المكتوب جابه بيمناه
والعبد للمكتوب مهما المحاذير
يوم الثلوث اللي وسمنا ووسمناه
تاريخ يحكي به كبار او مصاغير
ولو القضاء مدفوع دونك دفعناه
والله ما ياصلك لو به مناذير
والله لو للعمر بيعه ومشراه
إني لسوق عصي ذود مغاتير
واني لأسوق الحال والمال لفداه
لكن للميراد لازم مصادير
واليوم حنا وأنت في طاعة ارضاه
رب كريم كاتب للمقادير
نسألك يالمعبود تغفر خطاياه
عبدك وابن عبدك ولك صار ويصير
ويالله ياللي ما ندم من ترجاه
يا عالم بالباد وأيضاً الاسارير
تغفر لبو نافل وتمحي لسياه
وتنزله في روض كله نواوير
وتجعل إلى الجنة مصيره ومثواه
أنت الكريم الحي منشي المزابير
فرقاك يالطيب رزية رزاياه
وياشين فرقا قايدين الطوابير
يبكيك كل الناس خلان وعداه
ويبكي عليك طويق مع كشب والنير
ويبكي عليك اوجار نار اموشاه
وصينية تنعاك واتجاوب الطير
والحمد لله خلفك عيال ودهاه
نافل مع اخوانه كما كليب والزير
واللي وراه عيال ما غاب طرياه
يذكر ولا ينسى وملحوق بالخير
وللمرجله شاموا ويمشون ممشاه
وللازمه يقفون من غير تاخير
ما يختلف ساس على العز مبناه
لو يضربه زلزال والا معاصير
والقاف عيا يطيع من حر ما جاه
يقول انا المجروح وبالقلب تاثير
إن كان إبو نافل يا كيف ننعاه
رجل على الطالات كنه شمنصير
لو قيل كل الشعر مبدا ومنهاه
في حق إبو نافل يبي يصير تقصير
هذا قليل عذبتني خفاياه
من واهج فالكبد كنه مسامير
تم الكلام اللي هجدني أموالاه
ما ذقت حلو النوم عشت الامارير
