يابنت حذراء لا تجيك القراده
لا تسمعين اللي بخلك يقولون
تطمني والراس حطي وساده
أهل النمايم بينكم لا يحولون
الشر للنمام غاية مراده
يفرح إلى خلى اهل البيت يبكون
لا تترك النمام يطلق جياده
وأنتم على رد المكائد تعرفون
من لا حمى نفسه بقوة زناده
ما له مشاريه على ما يهلكون
اللي ردى حظه وخلى العباده
الناس عن مثله ترى ما يسألون
من لا ذكر ربه وقال الشهاده
خطر عليه ابليس وابليس ملعون
اللي يبي درب العلا والرياده
لا يقرب الواطي ولا يتبع الهون
درب العلا بالفعل ما هي رفاده
لن كان عن درب المعالي تسالون
بالعلم وأركان العمل له زياده
والصبر عز اللي عليها يطيقون
الدين مفتاح الفرج والسعاده
عادة كريم النفس يالي تحرصون
كثر الشكاوي ذل واقبح نكاده
ترفعوا يالي على الطيب تسعون
راع المنى راح العمر ما استفاده
من يتبع للهون خاسر ومغبون
العزم يظهر مع قوي الاراده
غمر على درب الشاكلات مقرون
الرزق يكتب قبل وقت الولاده
تنظيم رب الخلق ماهو بقانون
