سموك باسم الزعيم موحد الدولة
عبدالعزيز المؤسس.. طيب السيره
اللي جمع كل شعبه واجتمع حوله
على الشريعة.. وحب الله.. والغيره
يا سيدي كل شعر يطاح من طوله
احساسي أكبر.. وفعلك فاق تعبيره
حاولت أترجم مشاعر عنك منقولة
باحساس صادق وفكري صاغ تصويره
كل يحبك يا أبوتركي وأنا أقوله
غلاك بقلوبنا يزداد تقديره
سحاب خيرك عميم وجاري سيوله
أروي جفاف المشاعر من نزل خيره
في موقف العزل لك صوله ولك جوله
تشهد لك عيون خلق الله يا أميرة
طيبك تشوفه ومن جايمك يطوله
تجبر عزا اللي يجي لك من مقاديره
من جاك عينه من الأحزان مذهوله
ومن الليالي يصارع نظرة الحيره
يرجع وكبده من الأوهام مغسوله
يسابق أفراح عمره في نظر سيره
كل الصعايب تروضها ومحلوله
يا هونها في يمينك يا غلا الديره
تحلها يا حليف المجد بسهوله
فيك التواضع ورايك نافل غيره
شرعت بابك لكل اللي يجي حوله
لك فزعة عطرت بافعالك السيره
في هامة المجد تمشي عرضه مطوله
أقدام رجلك تسابق في مشاويره
هذا مريض.. وذي في البيت مشلوله
خيرك وصلهم قبل تاصل مداويره
أقولها والبشر من قبلي تقوله
والشعر عن حصر فضلك بان تقصيره
