جرح يجي مع زحمة جروح عادي
ما عاد تفرق عند قلبي عددها
اللي مضت دنياه بين النكادي
وش عاد لو زادت عليه بنكدها
عمري كذا من عادني بالمهادي
لا ولدت الفرحة تموت بمهدها
عمري كذا همي شرابي وزادي
تبلدت روحي حياتي جهدها
وان كنت ناوي ذبحتي يا ودادي
فالموت والله حالتي قد وردها
وما دامك اللي ما تعرف المبادي
ارحل وخل الروح تبقى وحدها
خل العيون اللي تعاف الرقادي
تبكي رداة الحظ وتشكي رمدها
ما عاد أبي منّك تمد الأيادي
خل الظروف تمد لي عنك يدها
ما عاد لك شي بقى في فؤادي
غير الجروح اللي تزاحم عددها
