يا مرحبا با للي له القلب مطواع
الهاجس اللي ضاع من بين يدي
هاجس لغير الحب والود ما طاع
وخلى جميع الناس تشتد ضدي
يا هاجس الطيبة ترى القلب ملتاع
بأسبابك دموعي جرت فوق خدي
شفتك تناديني وأنا منك مرتاع
خايف إذا طعتك تجاوزت حدي
تذكر يوم أطيعك ترى طحت بالقاع
ما فادني مزحي ولا فاد جدي
شربت منك الهم بالمد والصاع
وأعلنتها قصة عذاب وتحدي
غصبتني لين اقرب الناس لي باع
وعليه صحت ونحت وابديت وجدي
تغيرت فيني مسارات وأوضاع
كل الألم والهم تلقاه عندي
ما عاد ينفع فيك ترديد ما شاع
يوم كانت الطيبة مع الناس تجدي
حاولت أبين لك معاناة ما ضاع
ما ني بقدك وأنت منت بقدي
واليوم أبرحل عنك والقلب ملتاع
ما هو على كيفي ولا هو بودي
