يا الله يا للي كل مسلم يطيعه
وبأمره تدور ايامنا والليالي
يا الواحد اللي فزعتك لي سريعه
انت الذي نرجيك في كل حالي
هون عليّ الامر لين استطيعه
والطف وساعدني على ما جرالي
فرقا جرت منها عليه هزيعه
وارجى عوضها من عزيز الجلالي
والله لو العمر يشري لابيعه
من دون ابو نواف والله ما ابالي
انا اشهد انه حب قلبي ربيعه
وانا اشهد انه بالاخوة مثالي
في طول عمره ما سعى بالقطيعه
وشيءٍ على غيره صعيب المنالي
دايم مرامه للعلوم الرفيعه
ريف اليتيم وللارامل اضلالي
في كل دعوى تاجده بالطليعه
حتى بذل روحه لكسب المعالي
بأحسن خُلُقْ بأجمل صفات وطبيعه
صفات نايف ما يسعها المجالي
يا رب ابو نواف عندك وديعه
يا خير من يودع واليه المآلي
شهيد واجب وامر ربه مطيعه
في خدمة اهل الدين وإلهم موالي
واجبر مصاب اكبارنا والرضيعه
يا خير من يرفع اليه السؤالي
واخلف علينا في كبير الفجيعه
من طغمة اهل الغدر واهل الضلالي
اللي بغوا اهل الفعول الشنيعه
الخارجين عن امر عالم ووالي
اهل الغلو اللي سعوا بالخديعه
هدفهم التخريب بأول وتالي
واللي يبي الفتنه بأية ذريعه
حنا على المرصاد مثل الجبالي
لابد من يوم بالأنباء تذيعه
انه شرب مرٍ ولا ذاق حالي
حنا بدار محكمين الشريعه
هي معقل الاسلام والاعتدالي
مواقف ماهي علينا بديعه
ورث الجدود من السنين الخوالي
