قال الذي في ماقف العز ياقف
لاجت مواقيف المعزه وقفها
بحضور من للغاط زاير وشرف
يوم الخميس الغاط زايد شرفها
يا مرحبا مالاح برق تكاشف
في مزنة غرا بعيد طرفها
ترحيب من قلب صدوق ومنصف
قال الحقيقه كلمته مازهفها
بسلطان ابو نايف به الجود يوصف
ريف النفوس اللي شكت من ضعفها
حر نسل شقران زبن المردف
أهل الركاب اللي حفت من وجفها
شقران شيال الثقيلات بالحف
الى قامت كبار الزمول تحذفها
وين انت ياللي مدع الرجل تكلف
ودك على درب الرجال تحرفها
وناو تسير بسيرة المجد لك شف
تابع فعل سلطان لين تعرفها
سلطان حلال الصعيبات يعرف
مواقفه بالضيق كل عرفها
حاتم وبالحكمة وصيف للاحنف
اثمار جهده بالمساعي قطفها
فراج هم اللي دموعه تذارف
فيه الحديد بفعلة مقترفها
ومن فيض بحر الجود يمناه تغرف
يمد جزلات العطا ما نصفها
هذي من أفعال كثيرة تصنف
وباقي فعول الخير ما أحد كشفها
ومالك حرار الهجن مقطومة الخف
فج النحور اللي قليل علفها
الى درهمت خطر بركانها ترف
يطرب على الجنبين مومي سففها
وله في ملز الخيل خيل تعسف
أصايل ما كل فارس عطفها
أمثال عز الخيل نجم الى هف
خلا الرمك عند القطاة ونسفها
الله يعيد زيارتك يا أبيض الكف
زيارتك هذي علينا تخلفها
واليوم شعب المملكة كلهم صف
في ظل حكام الجزيرة شرفها
عيال عود ساد بالسيف الاعكف
جاها وهي صعبة وغصب عسفها
من بعد كان الجهل بالناس يعصف
وسط الجزيرة كل يوم يعصفها
خلا القبايل بالمحبة توالف
في حكمة الإسلام حقق هدفها
واليوم ابو فيصل بعهده تكاتف
في نهضة عجز الفكر ما وصفها
ولي عهده حازم الراي منصف
ضد النفوس اللي كثير صلفها
والنايب الثاني عن السعي ماكف
للمجد لو رجله تزايد كلفها
حكام شعب يحفظ العهد ما أخلف
لو كثرت صدوف الدهر ما صدفها
ولو قامت عقول المهبل تحرف
ظلت وتيار الجهالة جرفها
يثبت وتحت أمر القيادة تصرف
عهد من الجدان وماضي سلفها
والله يديم الأمن والشر يكتف
عن ديارنا ويبقى الأمن مكتنفها
ويعز من للدين ناصر ويلطف
فينا وتباع اللعين يخسفها
وما هل وبل من سحاب ترادف
صلوا على اللي رسالته ما حرفها
