|
العشب في روضة التنهاه
عضيد ومرار وخزاما
متخالطٍ جلّ من سواه
جديد واللي من العاما
قد له شهر شارع في ماه
ومظلّله شيح وثماما
من ماطره ما وطته الشاه
ولا توطته الاقداما
حماه من كلنا بحماه
اللي لنا درع وحزاما
فهد لعل الرخوم فداه
فهد فهد عز الاسلاما
حكم الشريعه فهد مشّاه
أنقذ مساكين وأيتاما
فهد نهار الوطن ناداه
لبّى ندى داره شماما
نهار والله ما ننساه
نهار به ذبح ومراما
يوم الوطن هم فيه أعداه
أحبط خطط كل الاقزاما
ثبّت حدود الوطن وأرساه
من حل في دارنا ناما
حكيم كل الدول تخشاه
يرجع له العلم لا قاما
محنكٍ ما تضيع أرياه
يضيم ما هوب ينضاما
لولا الولي ثم بعد لولاه
ياما من اللي حصل ياما
فهد فهد فزعة اللي جاه
لا كشّرت سود الاياما
أمدح فهد من فعل يمناه
ما هوب من فعل الاقلاما |
شعر: الدريبي بن راجح بن ذيبان السبيعي | 
