يا الله يا سايق ثقيل السحابي
يا اللي توجه لك وجيه المصلين
يا خالق ابن آدم من أصل الترابي
وفي تسعة أشهر كونه خير تكوين
اسنلك خفف ما جرى من مصابي
حيثك الى مالت تعدل الموازين
وترحم عزيزين الشيم والجنابي
وتجعل لهم في جنة الخلد تسكين
وتجبر عزانا في رجال نجابي
ياما سعوا بالخير بين القريبين
وين أبو محمد ما يرد الجوابي
من عقب ليل فيه يصفق بكفين
ويرقص بسيفٍ شايله بالنصابي
ويردد أفراح الجماعة بتلحين
كنه يقول أنه قريبٍ ذهابي
وهي رقصة الموت وداع المقفين
ثبتك ربي ساعة الاكترابي
وانزل على قبرك سكينة وتطمين
ذللت في دنياك جُلَّ الصعابي
ومديت يمنا الجود في العسر واللين
وين العديم اللي على الناس نابي
أبو سعد وجه السعد خطل الايدين
ما صك من دون المسايير بابي
وفي مجلسه دايم طليق الحجاجين
ويقول أنا عون لمنهو هقابي
يلقى ذرا بيتي يجي فيه ظلين
بنيت بقلوب الاوادم هضابي
في حبهم ما يغبطونك سلاطين
يا بو سعد ليت العمر لك يجاني
والله نسوق من الذهب والملايين
لكن حكم ربي وخط الكتابي
وفي حكم ربي صابرين مطيعين
وسهم المنايا يا سعد فيك صابي
ومع من تلوا بك جمعتوا بلحدين
ودعت دنيانا بعمر الشبابي
ولوك صغير أخذت حقك بتثمين
ويا سعود حلت ساعة الاغترابي
وأرسل مراسيله لكم وافي الدين
خطب جلل بدل نهرنا سرابي
وجفت ينابيعاً عليها مقيمين
وغطا على بيض الليال السوادي
وعبرات حزن الناس ما تفرق العين
يا الله تنجيهم نهار الحسابي
ومع من فقدهم في الجنان متلاقين
