تبارك منزل القرآن منه لسيد أمتنا
على محمد رسوله خير خلقه نزّل كتابه
كتابٍ للهدى يهدي ومن هديه هدايتنا
هدانا الهادي لهديه هداية واهتدينا به
كتابٍ تستمد الحكم من حكمه شريعتنا
مع السنة وهدي المصطفى المبعوث وأصحابه
بعد ذكر الله أبدأ بالسلام وبه بدايتنا
سلام الله عليكم واسلموا والقول نبدا به
هلا بك يا وزير النقل حييت بمدينتنا
الزلفي زاد نوره نور واقدومك هو اسبابه
هلا باسم المحافظ زيد زادت فيك فرحتنا
هلا ترحيبة المشتاق بعد فراق باحبابه
ارحب يا جبارة فيك وضيوفٍ معك جتنا
تراحيبٍ مثل طعم العسل بلسان شرّابه
هلا بقدومكم لبلادنا تكمل سعادتنا
هلا والضيف بالزلفي متى ما جا فرحنا به
من الزلفي لقايدنا فهد بارفع تحيتنا
نيابة عن هل الزلفي شبابه هم وشيابه
رجال وكلنا رهن الإشارة بامر قادتنا
بوقت النار دون الدار للأعمال جلاّبه
سعوديين نعرف والوفا معروف عادتنا
وعدنا فيه نوفي والوفا حنا عرفنا به
سعوديين ابو فيصل فهد قائد مسيرتنا
عريب الساس عال الراس نفخر وانتباهابه
سعوديين وآل سعود سادتنا وقادتنا
هم الساده هم القاده هم أهل الحكم واولابه
سعوديين وآل سعود يسعون لسعادتنا
وترى الحكم السعودي بالسعودية سعدنا به
سعوديين حنا واحسن حكومة حكومتنا
حكومتنا حكومة حكمها حكم رضينا به
حمانا ربنا وحما الجزيرة في حمايتنا
حميناها بحما ربٍ حمانا واحتمينابه
نعز بعز دين عزه الله منه عزتنا
لنا العزة بدينٍ ربنا ما عزنا إلا به
تعاليم الإسلام السامية للخير حثتنا
تأدبنا وأدبنا من تعاليمه وآدابه
ولا نخطي ولا نرضى الخطا والعدل غايتنا
مع المظلوم موقفنا وهذا ديننا أوصى به
ولا منا وقفنا وقَف العلم لوقفتنا
لنا موقف يشرفنا إلا منا وقفنا به
لنا عند الدول وشعوبها دايم مكانتنا
مكانتنا رفيعة والرفيع الله رفعنا به
بعد هذا لنا بعض المطالب من وزارتنا
عليها انخا الوزير اللي جميع الخير يهقابه
مزارعنا جميع خطوطها وعره وغثتنا
والله انا نتعذب بالطريق اذا مشيناه
مزارعنا ماهوب انتاجها ياصل براحتنا
وكم مرة نشيل العيش بالدرب وقلبنابه
طريق الغاط منه الحمد له على سلامتنا
خطير وكم غالي فيه يا غالي فقدنابه
نريده مزدوج وارجوك حقق فيه رغبتنا
لانه حلم هذا طالما حنا حلمنابه
ومع خط الرياض الموت فيه وفيه موتنا
لعلك تجعله خطين يا طيب ونرضابه
وخط ابا سديرة زفلته بالله وش تتنا
طلب ظمن المطالب وارجو انه ياجد اجابه
ومع خط البعيثة لو حضرت وشفت حالتنا
وحالة من يدرس بالبعيثة هو وطلابه
ومنها لام شيحه لو بعينك شفت سكتنا
رحمة الموتر اللي فوقها يمشي وركابه
بطانيج - وغراز - ودف - ونسم كفرتنا
وجر - وشر - وعقوبة - لعلك تامن عقابه
ويوم انت اعتمدته منه تمت بعض حاجتنا
لعلك تكمله حتى القصيم وتربطونا به
إلا يا طيب بك ثقة الدولة وثقتنا
كبيره حقق المطلوب وانته وضعنا ادرابه
وانا واثق بان الخير بقدومك لديرتنا
لانك كالسحاب اللي نشا وارعد وجامابه
