بديت بذكر من يعلم بسر الفرد وجهاره
وكتبت الشعر ببيوت كما الياقوت منظومه
اغيص بوسط بحر الشعر واخذ منه محاره
واغرد به لمن يستاهله ما ابخل بمقسومه
سلام الله سلام غالي قدره ومعياره
يقدم للوزير الشهم واهل الحقل بقدومه
ألا يا مرحبا وأهلا هلا بزيارة جباره
عدد ما شع من برق يلوح بمظلم غيومه
هلا به عد ما شيف السحاب وهلت امطاره
وعدد نبت الربيع وما انتشى شيحه وقصيومه
زهت بقدومه الزلفي ألا وانعم بها زياره
واهاليها من الفرحة ترى ما هيب مليومه
نرحب فيه ونحييه وقدومه لنا بشاره
هلا ترحيبة فيه وضيوفه معه محشومه
وزير النقل حييناه لاخلاصه ومقداره
فهو واف من رجال الوفا قرم من قرومه
وزير يعمل بصمت وجد ويقطف اثماره
وزير مخلص يرسم خطط بالجد مرسومه
وزير له نقدم شكرنا تاره بعد تاره
على فرع جميع محافضتنا منه مخدومه
قبل فرع الوزارة رجل راع الشغل دواره
يسافر له مسافات طويله لجل ملزومه
واما اليوم كل لازمه يقضيه بدياره
وطابت كل نفس قبل هذا اليوم مهومه
نقدم شكرنا بلفظ جزيل وافضل عباره
بطاقة شكر يا جباره يختم الحب مختومه
بعد هذا لنا مطلب نبيك تعجل اخباره
نبي منك الوعد وانته وعودك دوم محسومه
على الله ثم عليك اشكي طريق كثرت اخطاره
رفيع وضيق وخطر ونبيك تعدل رسومه
طريق الغاط ياكوده والا ياصعب مشواره
مصيده للشباب ومن مشى به ينتظر يومه
طريق منه شفنا الضيم وبه النفس محتاره
وكثير من العوايل منه منكوبه ومكلومه
نبي خط يوصلنا السريع تحط مسياره
يخدم اهل المزارع والمسافر تقوي عزومه
وعسى الله يحفظ اللي نفتخر دايم بتذكاره
فهدنا خادم البيتين رجل المجد زيزومه
فهدنا اللي نهار الكون لا من لجلج غباره
جميع عداه مخذوله ومكسوره ومهزومه
حبيب الشعب وأبو الشعب ما نطلع عن اشواره
نحبه والمحبه له بوسط القلب موشومه
وابو متعب ولي العهد له كلمات بتاره
الا منه نطق كلمه عداة تصير منجومه
وسلطان الذي له سيرة بالخير معطاره
ومحبتنا لابو خالد عليها النفس مفطومه
ونايف في سبيل الامن له وقفات جباره
وخشوم اللي يعادونه بحد السيف مدقومه
وسلمان الذي يسمع كبار الشعب وصغاره
يساعد كل نفس من ربيع الوقت محرومه
ذرانا هم ذرانا عن هموم الكون واكداره
نعيش بظلهم بالامن والاخطار معدومه
وعسى الله يحفظ الدوله عن الارهاب واشراره
ويحفظها عن انجاس بنار الحقد ملغومه
وعسى من يعبث بامن البلد ويجهز اوكاره
يرد الله عليه الكيد لجل يموت بسمومه
والا يا الله تعز الدين واللي يرفع شعاره
وتنصر كل نفس من عدو الدين مظلومه
وتعلي راية التوحيد فوق البر وابحاره
وتحمي دينك الاسلام عما دير خصومه
وصلاة الله وتسليمه على اللي شعت انواره
نبي الحق من نفسه عن الزلات معصومه
