الطف بنا يا لطيف ويالله الرحمه
عند اختلاف المبادي والمفاهيمي
عشنا وشفنا عسى الله يحسن الختمه
ويقسم لنا الخير من خير المقاسيمي
وأنا اشهد ان الحظيظ اللي عن الزحمه
يم الخلا مع حلاله دايم مقيمي
والعشب مدّ النظر ما داسته جزمه
والبل ترعى الحيا وضح ومجاهيمي
يرتاح باله وينسى الهم والكتمه
لا شاف مزنٍ من الوسمي مقاديمي
اليا شعق ضوح برقه واشعل العتمه
وارهش وجهّى غشينه له حناتيمي
وان راح للقنْص ما يطلق ولا صتمه
يقنص بحرً عفَر نادر صواريمي
ينام بدري وناره طلعت النجمه
تزْعر ونجره يصوّت للشغاميمي
ما شال بيجر ولا جوال أبو نغمه
ولا شاف (بِق برذر) و(ستار اكاديمي)
