العيد حل وشب في الصدر نيران
كل سعد بالعيد ونفسي شقيه
أغالب العبرات والفكر حيران
لجيت ابسلي مر طيفه عليه
لامن ذكرت اللي له القلب ولهان
ما عاد أميز بين صبح وعشيه
أخوي جنسه ما ذكر بين الاخوان
قلب رحيم وما يدوس الخطيه
ريف الضعيف اللي شكى ضيم الازمان
يعطي الكثير بدون من وأذيه
يرخص بماله ما يحسب لخسران
نفسه عزيزه ما تحب الدنيه
لعدَّوا الأخيار في كل ميدان
له راية بيضاء ونفس سخيه
يبكي على موته قرايب وجيران
دايم يواصلهم بعطف وهديه
ويبكي عليه اضعوف وايتام واخوان
طبعه يواسيهم بروح رضيه
من عقب فرقي اخوي حالي بنقصان
دنيا بدونه مالها قابليه
أصبر وأخلي الصبر للنفس عنوان
لعل والي العرش يرضى عليه
ما مات من خلف اعيال لهم شان
يحيون ذكره بالخصال الوفيه
يالله ياراعي الفضايل والاحسان
ترفع مقامه في جنان عليه
وصلاة ربي عد نبت بريضان
على رسول الله خير البريه
