صليت للمولى صلاة استخاره
سبحانه المعبود علام الأسرار
الليل الأسود بيّنٍ من نهاره
يقبس مقابيس القشر سر واجهار
راعي المكاسب ما يحب الخساره
كلٍ يبي الجنة ولا أحدٍ يبي النار
اللي يشاور واحدٍ ما استشاره
إما ندم وألا تعرض للأضرار
راع الردى حذرا تدفأ بناره
أبعد عن النمرود لو صار ما صار
جنب مسارك لا يجي مع مساره
بالشر له مثوى وبالخير لك دار
الآدمي لولا الفضيلة عباره
حيوان ما له لا شهامة ولا كار
من لا ينفذ بالمعرفة قراره
يشرب قراطيع المذله والأمرار
لا خير في اللي ما عرف حق جاره
أخير من دنياه قصاف الأعمار
