يا وجودي وجد من جاه قدره
واحدٍ ما بين عمه والخوال
أنجرح والجرح في وسط ظهره
ساعة والموت ما جاء له مجال
انكفوا والموت معطيه نحره
من صغيرٍ كن في عينه سؤال
أرسل النظرات والقلب شطره
والعيون تقول يا موتي تعال
رمشه المسموم بالقلب سمره
يرتكي للزين في حسن ودلال
ما بقى للزين مثقال شعره
ما لمحته فيه.. لله الكمال
القمر لا بان في نصف شهره
يسأله بالله من وين الجمال
في كفوفه جاب ليله وفسره
من جماله فوق منسوج الخيال
صابني والجرح ما جاب خبره
يبتسم والجرح من عينه حلال
المحبة ريح والقلب شجره
ما شكت للقاع من صلف الشمال
أشهد إن الزين في عز دهره
من جماله صار يضرب به مثال
يا عساي فداك يا سود حوره
يا عسى يفداك عمي والخوال
